Mohorović reportažom obilježio Dan Općine Raša

Danas se obilježava Dan Općine Raša. Slavi se u spomen na 4. studenoga 1937. godine, datum inauguracije Raše, nastale zbog potreba ovdašnjeg rudnika ugljena.

Upravo za tu prigodu, Daniel Mohorović, napisao je reportažu za Rašu, koju objavljujemo u nastavku:

ŠINJORA RAŠA

(reportaža)

Na cetiri martinšćaka

poznata šinjora Raša

frajala je osamdeseti rojendan.

Celi don bila je nervoža;

kada se je stala okole sedan,

kada je jala kruh i kafe,

bila je nervoža dok je štela foji,

ma anke dok je duro ubed.

Celi don je đornalisti cekala;

nervoža spracun stroha:

ca ćo je onako kurjoži pitat?

Ma kad so đornalisti pasali prah kući

nošli so šinjoro ko ni trebalo tentat.

Se slabeje cuje i vidi, ma pameti,

a i zajik braštulo kako mažinin.

Kako da je samo đornalisti cekala

da se ca ima zbraštulo:

547 don mat jo je va trbuhe nosila.

Da ni bilo kovi ne bi bilo šinjori Raši.

Mat ni se Zemlja zove ,

oca so zvoli Finali.

Ne spameti ga se.

Z matero još vajka spi.

Trebala se zvat Liburnia.

Joko ni je drogo da se Raša zove,

po reke, po vode,

ka je pocetak i kroj,

ka je se.

Šontula Benita nanke se ne spameti.

Jedonput je s hridroplanon priša,

jodan zoš grod delajo va škulje,

a ne na bresciće.

Na Benita ne želi besedi trošit ,

dosta grdega je stori.

Raji gona za Tita. Videla je Storega,

mohala mu dok je pasiva.

Bilo ni je se milo oko srca.

Šinjora Raša pravi da je storena od karbona.

Kovari so njejni deca.

Kovar je njejni sin.

Kovar,

crn i trudan, samo sa belemi vocijami.

Kovar.

kega je mat ili žena s teplo vodo cekala,

a on bi proteštira, ca će se prat

kada veceras mora va kovo tornat.

Sake nedelji za deca svoji moli

va crekve santa Barbari

ka je njena vršnjakinja;

crekva ne svetica.

Svetica je nešto stareja i braveja:

ona je ušla od porednega oca

skrila va steno od kamika.

I njo je škulja škapulala i storila.

Kad je kumpanija prišla

šinjora Raša je i zakantala.

Treba vajka kuntenat bit, nicega željan,

nikad lamentat i njurgat.

Ako se na takovega nadvertiš,

pusti ga, na drugo bondo hoj .

Na mire s drugen,

na mire sobun,

pravi šinjora Raša.

Prvo nego so đornalisti portili

šinjora Raša je nopet rekla

da je storena od karbona.

(Štoti ljudi prave da je šlovek storen od zemlji:

Onda son ja storena od karbona.)

Karbon je Raša!

Raša je karbon!

(Karbon kega više ni

napiso je đornalis.)

Daniel Mohorović